ሥልጣን ከሕዝብና ከአገር በላይ አይደለም!

የኢትዮጵያ ሕዝብ ለዘመናት በበጎውም ሆነ በክፉ ጊዜ እርስ በርሱ እየተደጋገፈ እዚህ ደረጃ ያደረሳት አገሩ፣ በገዛ ልጆቹ መቅኖ እንድታጣ ሲደረግና የባዕዳን መዘባበቻ ስትሆን እንደማየት የሚያሳዝን ነገር የለም፡፡በዚህ ዘመን በቁጭት፣ በእልህ፣ በንዴት፣ በቂም በቀል፣ በጥላቻና በመሳሰሉት ለአገር የማይጠቅሙ አረንቋዎች ውስጥ ሆኖ ስለዴሞክራሲም ሆነ ስለዕድገት መነጋገር አይቻልም፡፡ የኢትዮጵያ ሕዝብ ታጋሽ፣ ጨዋ፣ ኩሩና አርቆ አሳቢ በመሆኑ ይህንን አኩሪ የጋራ እሴት ለሚመጥን ፖለቲካዊ ግንኙነት መዘጋጀት የሁሉም የፖለቲካ ኃይሎች ኃላፊነት ነው፡፡ አንዱ አሸናፊ ሌላው ተሸናፊ የሚሆንበት ኋላቀር አስተሳሰብና ጀብደኝነት ሳይሆን፣ በመርህ ላይ የተመሠረተ ውይይትና ድርድር ለአገር እንደሚበጅ መቼም ቢሆን መዘንጋት የለበትም፡፡ ኢትዮጵያ ለሁሉም ልጆቿ እኩል እናት እንድትሆን ከተፈለገ፣ ሁሉም ልጆቿ ያለ ምንም አድልኦ የሚሳተፉበት ዴሞክራሲያዊ ዓውድ መፈጠር አለበት፡፡ ይህ በተግባር ይረጋገጥ ዘንድ ደግሞ መጀመርያ ከጀብደኛ ድርጊቶች መታቀብ፣ ለሕግ የበላይነት መገዛት፣ ከሕገወጥ ተግባራት መራቅ፣ የዴሞክራሲን እሴቶች ማክበር፣ ሥልጣን ከአገርና ከሕዝብ ህልውና እንደማይበልጥ ማመን፣ ከምንም ነገር በላይ ሕዝብን ማክበር በምንም ዓይነት ሁኔታ ሊዘነጋ አይገባም፡፡ ይህንን ማድረግ ሲቻል አገር ሰላም ትሆናለች፡፡ ሕዝብ በሚገባ ይረካል፡፡ ሥልጣን ላይ ብቻ ማተኮር ለአገር አይበጅም፡፡በተቃዋሚ የፖለቲካ ፓርቲዎች መካከል ያለውን የተዛባ ግንኙነት በማስተካከል፣ ወደ ትክክለኛው ጎዳና መመለስ የሚቻለውም ራስን ለመላው ሕዝብ ፈቃድ ማስገዛት ሲቻል ብቻ ነው፡፡ ሕዝብ የአገሪቱ ሥልጣን ሉዓላዊ ባለቤት መሆኑን በተግባር በማረጋገጥ፣ ሕጉ በሚፈቅደው መሠረት ሰላማዊና ዴሞክራሲያዊ ግንኙነት መጀመር አለበት፡፡ በእኩልነት ላይ የተመሠረተ ግንኙነት ሊኖር የሚችለው መጀመርያ የፖለቲካ ምኅዳሩን ወለል አድርጎ በመክፈት ነው፡፡ የአገሪቱን የዴሞክራሲ ሒደት የቀለበሱና የፖለቲካ ምኅዳሩን ያሽመደመዱ አላስፈላጊ ድርጊቶች ተወግደው፣ የአገሪቱ የፖለቲካ ፓርቲዎች በነፃነት የሚንቀሳቀሱበት መልካም አጋጣሚ ሊፈጠር ይገባል፡፡ ሌላው ቀርቶ በሕግ ዕውቅና ያገኙ መሠረታዊ መብቶች ተከብረው፣ የአገሪቱ ፖለቲካም ከታሰረበት መፈታት ይኖርበታል፡፡ አሳዛኝና አሳፋሪ የፖለቲካ ጉዞ ተገቶ ለሕዝብ ፈቃድና ፍላጎት መገዛት ያስፈልጋል፡፡ ኢትዮጵያ የነፃነት፣ የእኩልነትና የፍትሕ አገር መሆን የምትችለው በሥልጡን ፖለቲካ ብቻ ነው፡፡በአሁኑ ጊዜ በተቃውሞ ጎራ ያሉ የፖለቲካ ኃይሎችም ሆኑ የአገር ጉዳይ ያገባናል በማለት በፖለቲካ ውስጥ የሚሳተፉ ወገኖች ፣ ለሕዝብ ፈቃድና ፍላጎት ተገዥ መሆን ይኖርባቸዋል፡፡ መንግሥት ለእውነተኛ ውይይትና ድርድር መቅረብ አለበት ሲሉም ፣ በእነሱ በኩል ያሉትን ክፍተቶችና ችግሮችም አንጥረው ለማውጣት መዘጋጀት ይኖርባቸዋል፡፡የበለፀገችና ዴሞክራሲያዊት አገር የምትፈጠረው ራስን ለሕዝብ ፍላጎት በሚመጥን ደረጃ ማዘጋጀት ሲቻል ብቻ ነው፡፡ ሁሉም ኢትዮጵያውያን የአንድ ጎራ ደጋፊ መሆን እንደማይችሉ በመገንዘብ፣ ድጋፍና ተቃውሞን በአግባቡ ማስተናገድ የግድ ይላችዋል፡፡ የፖለቲካ ምኅዳሩ በስፋት እንዲከፈትና ሕጋዊና ዴሞክራሲያዊ የፖለቲካ ትግሉ እንዲቀጥል፣ በሠለጠነ መንገድ የተበላሸው ግንኙነት መታደስ አለበት፡፡ሰላማዊው የፖለቲካ ትግል አሰልቺ፣ አስመራሪና ብዙ ፈተናዎች ቢኖሩበትም፣ በፅናት ታግሎ የሕዝብን ልብ መግዛት መቻል ትልቅ ነገር ነው፡፡ ሕዝብ የሚፈልገው በዚህ መንገድ የሚጓዝ ፓርቲን ነው፡፡ ሕዝብን ማክበር የሚጀመረውም ከዚህ ነው፡፡ ከሥልጣን በላይ አገር አለች ሕዝብ አለ፡፡ ለሕዝብ ፈቃድና ፍላጎት መገዛት ይገባል፡፡ የኢትዮጵያ ሕዝብ የሚፈልገው ይህንን ነው፡፡የዚህ ጨዋና አስተዋይ ሕዝብ ዋስትናው በአንድነት መቆም መቻል ነው፡፡ ይህ አንድነት የተለያዩ ማንነቶችን፣ ባህሎችን፣ ቋንቋዎችን፣ እምነቶችንና የመሳሰሉ ልዩነቶችን የሚያከብር ሲሆን ደግሞ የኢትዮጵያ ሕዝብ ለአገሩ ክብርና ዘለዓለማዊነት በጋራ ይቆማል፡፡ ይህ ከትውልድ ወደ ትውልድ ሲሸጋገር የኖረ የአገር ፍቅር ስሜት ይበልጥ አብቦ የበለፀገችና ዴሞክራሲያዊት ኢትዮጵያ ትገነባ ዘንድ ቅንነትና በጎ ፈቃድ ያስፈልጋል፡፡ ዴሞክራሲያዊ ሥርዓት የሚገነባው በአምባገነንነት አስተሳሰብ ስላልሆነ፣ ለዴሞክራሲያዊ እሴቶች መገዛት ተገቢ ነው፡፡ የአገርን ህልውና የሚንዱ ተግባራትም ሆኑ፣ ሥልጣንን ለብቻ ለመቆጣጠር የሚደረጉ ፀረ ዴሞክራሲ ድርጊቶች ፋይዳ የላቸውም፡፡ ከዚህ ይልቅ በሕዝብ ፈቃድና ፍላጎት ላይ የተመሠረተ የፖለቲካ ግንኙነት ማስፈን ይገባል፡፡ የኢትዮጵያ ሕዝብ ከዳር እስከ ዳር የሚፈልገው ሰላም፣ ዴሞክራሲና ልማት ነው፡፡ በእኩልነት ተከባብሮና ተፋቅሮ መኖር ነው፡፡ ከጋራ እሴቶቹ የሚመነጩትም በአንድነት መቆም፣ የጋራ ግብና ራዕይ ይዞ ከትውልድ ወደ ትውልድ መቀባበል ነው፡፡ በዚህ መንፈስ የዓመታት ስህተቶችን ማረምና አዲስ ምዕራፍ መጀመር የወቅቱ ጥሪ ነው፡፡ ይህ ዕውን እንዲሆን ደግሞ ለሕዝብ ፈቃድና ፍላጎት መገዛት ባህል ይሁን፡፡ ሥልጣን ከሕዝብና ከአገር በላይ አይደለምና! ከ ጋዜጣ ሪፓርተር ርእሰ ኣንቀፅ የተወሰደ፡፡


0
0 0 vote
Article Rating
Subscribe
Notify of
guest
0 Comments
Inline Feedbacks
View all comments